Os populares, cuxos concelleiros xa presentaron reclamacións a título particular por cuestións de normativa, agradecen a implicación e compromiso da veciñanza “na defensa do interese xeral, do sentido común e da supervivencia de moitas familias e negocios”
Os tres grupos municipais do PP na comarca do Morrazo veñen de convidar a todos os veciños de Cangas, Moaña e Bueu a facer “un esforzo final” na presentación de alegacións contra a “suba brutal e inxusta” da taxa do lixo cara o ano 2026 impulsada polo BNG desde a Mancomunidade co obxectivo de canalizar pola vía das reclamacións o “clamor social” contra esta medida para tentar a súa paralización.
“É moi difícil porque o Bloque está enrocado neste taxazo para que sexan os veciños o que paguen a súa pésima xestión do lixo na última década, pero temos que tentalo ata o final, polo que os veciños deben seguir nesta liña e, no caso de que o precisen, saben que poden contar co apoio e asesoramento dos grupos municipais do PP porque estamos ante unha aberración e ante a situación máis grave que vive O Morrazo na última década”, manifestaron os tres voceiros municipais, Dolores Hermelo, Alfonso Piñeiro e Elena Estévez.
Os populares dos tres concellos, cuxos concelleiros xa foron presentando reclamacións a título particular xa que por cuestións de normativa non o poden facer a través dos grupos municipais, quixeron agradecer a implicación e compromiso da veciñanza durante todo este proceso, que afronta a recta final da fase de información pública e presentación de alegacións ata o próximo mércores 3 de decembro, inclusive. “Pase o que pase estamos moi orgullosos dos nosos veciños, porque volveron a amosar o carácter e a bravura propios da xente da nosa comarca na defensa do interese xeral, do sentido común e da supervivencia de moitas familias e moitos negocios, que teñen dificultades para chegar a final de mes, porque a inflación é insoportable e encher a cesta da compra unha misión imposible, e para os que este taxazo nacionalista pode ser a estocada final”, advertiron os tres concelleiros do PP, que indicaron que, polo momento, se descoñece a cifra de alegacións presentadas, pero, polos cálculos realizados, poden contarse por centos.
Ronsel de mentiras do BNG
Por outra banda, as tres agrupacións locais do PP quixeron lembrar que a responsabilidade desta suba da taxa do lixo, “que é tan brutal que tivo eco en toda Galicia e incluso no resto de España”, deriva exclusivamente do BNG e da súa “pésima xestión” do servizo desde a Mancomunidade, xa que a prestación é moi deficiente “e posiblemente a peor da provincia de Pontevedra pola súa deixación de funcións e aínda por riba pretende arranxar o seu pasotismo e inacción asaltando os petos dos veciños”.
Ademais, arremeteron contra os tres gobernos locais do BNG por “mentir con descaro” en todo este proceso, xa que pretenderon culpar da suba a Sogama “pero a conxelación das taxas de Pontevedra ou Marín para o próximo anos desmontou por completo a súa argumentación” e ademais faltaron totalmente a verdade nas cartas informativas enviadas á veciñanza desde a Mancomunidade sobre os custes do servizo, “xa que inflaron a cifra que se paga á sociedade de tratamento do lixo para tratar de xustificarse ao omitir a importante achega da Xunta para compensar aos concellos para paliar o imposto á incineración aprobado polo Goberno de España”
Así, indicaron que esta suba da taxa do lixo no Morrazo xurde exclusivamente pola súa decisión política e porque, ante a súa ineficacia, non saben como superar a súa mala xestión do servizo máis que espetándolle máis impostos á xente e engadiron que a nova ordenanza “é un sensentido máis alá do incremento brutal posto que incumpre por completo o seu defendido principio de ‘quen contamina, paga’, xa que hai locais, oficinas, tendas de roupa e outros negocios que apenas xeran lixo e aos que lles pretenden sacar máis de 1.000 euros anuais”.
“Neste proceso, no que aínda mantemos unha mínima esperanza, veuse a auténtica cara do BNG, e principalmente dos tres alcaldes do Morrazo, xa que non saben xestionar, actúan con sectarismo, recurren á mentira e, ante os seus problemas, limítanse a fritir a impostos aos veciños”, concluíron Hermelo, Piñeiro e Estévez.