Os populares destacan que, mentres a Xunta avanza na desafectación dos terreos portuarios, Costas mantén a súa chantaxe coas Naves de Córdoba coa complicidade dos socialistas e nacionalistas cangueses
O Partido Popular de Cangas botou en falta algún anuncio na visita do líder dos socialistas galegos, José Ramón Gómez Besteiro ao municipio. “Tampouco nos sorprende”. Para a formación, o máis relevante non foron as súas manifestacións “con acusacións baleiras ao Goberno galego” senón a falta de anuncios “de novos investimentos, a desafectación dos terreos de Costas nas Naves de Córdoba, as carencias no financiamento estatal do Servizo de Axuda no Fogar, ou o taxazo do lixo por unha norma imposta polo Goberno de Pedro Sánchez”.
O grupo maioritario da Corporación sinalan que “se hai unha administración que discrimina a Cangas é o Goberno central”. Argumentan que “mentres a Xunta avanza no complexo proceso de desafectación dos terreos portuarios innecesarios, Costas mantén o seu veto a desfacerse das Naves de Córdoba. Algo que non está a acontecer noutros municipios galegos como Vilanova de Arousa ou Cambados”. A isto, suma o nulo mantemento dos espazos dependentes por este organismo estatal que mantivo pechado o paseo marítimo varios anos “e que foi reaberto polo tripartito pola porta de atrás”.
Nesta liña, recordan o Estado continúa incumprindo a lei infrafinanciando a dependencia en Galicia, “o que impide que concellos como Cangas teñan máis recursos para o servizo de Axuda no Fogar” explican. “Aportan pouco máis do 30% cando tiñan que aportar o 50% sendo a Xunta a que máis aporta ao sistema xunto cos concellos” engaden. “Unha vez máis comprobamos o mansiños que son os actuais responsables municipais na defensa dos intereses da veciñanza”.
Unha xestión que contrasta coa realizada pola Xunta, que mantén as bonificacións ao transporte público do que se benefician moi especialmente os veciños e veciñas de Cangas a través do transporte de ría. Tamén con liñas de apoio ao noso tecido económico con medidas como o Bono Comercio, o Bono
Turismo, melloras nos equipamentos portuarios ou axudando ás nosas entidades deportivas e sociais, entre outras. “Un dos maiores problemas que temos é que contamos cun goberno incompetente que non solicita as axudas, como realizan outros municipios da nosa contorna, polo que levan perdidos case 1 millón de euros” declaran. “Unha que se multiplica se falamos de fondos europeos”.
“Pese a esta nula xestión e grazas á Deputación de Pontevedra estase realizando importantes actuacións en instalacións municipais como o Estadio Municipal de Atletismo ou na piscina municipal. “Outras están sen executar pola falta de traballo do BNG e os seus socios, incapaces de sacar adiante os expedientes, como o Pavillón do Gatañal” denuncian. A estas iniciativas suman outras como a limpeza viaria ou reasfaltados. “En total, case 5 millóns de euros desde o 2024” destacan. “O que se pregunta a veciñanza é onde meteron os máis de 40 millóns que leva gastados o tripartito este mandato” continúan. “Dende logo, non en Cangas, dado o estado de absoluto abandono no que se atopa a nosa vila” rematan.